Мемлекеттік шаралар жоғары оқу орындарында оқуды, шетелде тағылымдамадан өтуді, ғылыми зерттеулерді және жас мамандардың тұрғын үй мәселелерін шешуді қамтиды.
Жекелеген өңірлер үшін қосымша гранттар бөлінеді. Сондай-ақ мүмкіндіктерді жергілікті атқарушы органдар, «Қазақстан халқына» қоры, бизнес және жоғары оқу орындарының өздері ұсынады.
Стипендиялар және жатақханалар
2020 жылдан бастап бакалавриат студенттерінің стипендиялары екі есе өсті — 52,4 мың теңгеге дейін. Педагогикалық мамандықтар үшін төлемдер 84 мың теңгеге дейін артты. Магистранттар мен докторанттардың стипендиялары 1,75 есе өсті.
2025 жылы 10 мыңнан астам орынға арналған 30 жаңа жатақхана пайдалануға берілді. Жетім-студенттерге және I, II топтағы мүгедектігі бар адамдарға тұрғын үй шығындары өтеледі.
«Болашақ» бағдарламасы
Соңғы үш жылда 994 стипендиат ақпараттық технологиялар, инженерия, машина жасау, медицина, қаржы және құқық бағыттары бойынша жетекші шетелдік университеттерде оқудан өтті. Тағы 342 маман шетелде кәсіби тағылымдамадан өтті.
2026 жылдан бастап халықаралық олимпиадалардың, ғылыми және шығармашылық конкурстардың жеңімпаздары бакалавриат бағдарламасы бойынша оқу мүмкіндігіне ие болды.
Жас ғалымдарға қолдау
2025–2026 оқу жылына докторанттарды дайындауға 2919 грант және индустриялық PhD механизмі бойынша 110 грант бөлінді. «Жас ғалым» бағдарламасы жыл сайын жас зерттеушілердің ғылыми жобаларына мың грант береді. «Үздік жас ғалым» жыл сайынғы сыйлығы тағайындалды.
2021 жылдан бастап «250 ғылыми тағылымдама» бағдарламасы бойынша 1543 қазақстандық ғалым шетелде оқу және тағылымдамадан өтті, олардың 62%-дан астамы — жас зерттеушілер. 2023 жылдың қыркүйегінен бастап бір докторантты дайындауды қаржыландыру орта есеппен 17%-ға өсті.
Зерттеушілерге арналған тұрғын үй
722 жас ғалым тұрғын үймен қамтамасыз етілді. Олардың 584-і Ғылым және жоғары білім министрлігі мен «Отбасы банк» АҚ-ның бірлескен бағдарламасы бойынша пәтер сатып алды, ал 138-і тегін негізде тұрғын үй алды.